Atto Primo: Scena Quinta

(Dopo due ore. Suona il campanello. Nannina dalla cucina va ad aprire. E’ la nipotina Antonella, di 13 anni.)
ANTONELLA: Tanti auguri, nonna. (Si baciano.) Vi ho portato un panettone ed una bottiglia di spumante... Mamma e papà verranno più tardi.
NANNINA: (Mentre cerca il borsellino nella borsetta appesa all’attaccapanni) Antonè, bella dâ nonna, mettile ncopp’â tàvula; doppo ‘e poso io. (Prende un biglietto da diecimila lire.)  Questo è per te!
ANTONELLA: (Molto contenta) Grazie! (Piega accuratamente il biglietto e lo mette nel suo borsellino.) Il nonno non c’è?
NANNINA: E’ ghiuto âccattà duje biancale. Mo ‘o vedi ‘e venì.
ANTONELLA: Nonna, Tonino sta di là? (Indica la porta delle camere.)
NANNINA: Chi, Tonino?... No! Sta di qua! (Indica la porta dell’ingresso.) Chillo?... Si vene ‘a morte nun ‘o trova dint’â casa!!!... Antonè, levate ‘o cappotto e viene cu me in cucina. Aiutame nu poco a preparà pe stasera.
ANTONELLA: (Si toglie il cappotto.) Nonna, dove lo metto?
NANNINA: Ncopp’ ô lietto 'e Tonino! (Va in cucina.)
(Antonella va in camera. Dopo un po’ torna e va in cucina. Intanto arriva Totonno, con alcuni biancali avvolti in un giornale. Apre lo sportello sinistro della credenza e li nasconde. Si toglie il giaccone e il berretto e li mette sul divano. Osserva poi i regali sul tavolo, incuriosito, e scrolla le spalle. Prende il giornale e va a sedersi, con le spalle al divano. Lo sfoglia e legge. Dopo un po’ entra Antonella. Si avvicina lentamente al nonno e lo fa spaventare con un colpo di mano sul tavolo.)
ANTONELLA: Boom!
TOTONNO: Oooooh! (Mette istintivamente la mano destra sul cuore.) Uè, Antonè! M' he fatto piglià na paura!
ANTONELLA: Ah! Ah! Ah!... (Si avvicina al nonno e lo bacia.) Nonno, tanti auguri e buone feste!... Mamma e papà vengono più tardi.  Io sono venuta ora perchè zio Stefano mi deve aiutare a fare un tema.
TOTONNO: Scurdatìllo pròpio!... Chillo sta già penzanno â festa 'e stanotte. Dimane mattina va appriess’ ô Maio. Doppo mangiato nun se fa arrivà 'o mangià manco ncanna e esce n'ata vota cu ‘e cumpagne pe ghì a piglià 'e sarcinielle1 p’ ‘o fucarone! Dopporimàne2, po, ce sta 'a prucessione 'e Santo Stefano...
ANTONELLA: (Interrompendolo) E noi subito dopo partiremo per Roccaraso. Perciò lo dovrò fare ora!
TOTONNO: Va buono!... Mo che vene, vedimmo nu poco.
ANTONELLA: (Prende il giaccone e il berretto del nonno.)
Nonno, li porto in camera. (Esce.)
(Totonno continua a leggere. Dopo un po' entrano Tonino e Peppe. Parlano tra loro, mentre si tolgono i giacconi e li appendono all'attaccapanni. Guardano il padre e si fanno un cenno d'intesa.)
TONINO: (Fingendo di raccogliere qualcosa sul pavimento) Papà, t'è caduta 'a virgola! (E gliela mette di nuovo sul giornale!)
PEPPE: (Ridacchiando) Tonì, è vecchia sta battuta. Nun fa rìrere chiù a nisciuno! (E gli allunga uno scappellotto.)
(Totonno lo segue con lo sguardo senza fiatare. Peppe va silenziosamente dietro al padre e con l'indice della mano destra gli spinge il berretto sugli occhi, trattenendo a stento una risata. Totonno, munito di tanta pazienza, lo rimette a posto e lo guarda in modo beffardo. Entra Nannina.)
NANNINA: Ué! Site juti ô campusanto a purtà 'e sciure ncopp’ ‘a tomba d’ ‘a nonna?
TONINO: Io sono andato ieri!
PEPPE: Io vaco dopporimane... primma che esce Santo Stefano!
TOTONNO: (Serafico) Guagliù, si nu tenite genio, è inutile che ce iàte! Nun è necessario!.. ‘E muorti se hann’ ‘a vulé 3 bene primma 'e murì, quanno só vivi!... E pe tutto l'anno. Da Gennaio a Dicembre.  O penzate  ca  purtanno  'o cuoppo a Natale state câ cuscienza a posto?... ‘E sciure, 'e lumine, 'e messe... POI... servono sulo ê  vivi pe se fà perdunà dê muorte pe tutt’ ‘e peccate che teneno ncopp’ â cuscienza!... E vuje ricurdàteve na cosa. Io, 'e sciure, nun 'e voglio ô campusanto, quanno vaco all’aldilà. Io vulesse pròpio essere rispettato pettramènte ca sto nell'aldiqua. O si no4 nu serve a niente a ve mettere 'a veste nera pe tre 'o quatto settimane e a ve fà veré chê spalle chieiàte5  e  chê mane mpiétto cómme 'e muónece e po' ve scordate 'e me!...  E si facìte 'e scieme, quanno me venite a chiàgnere ncopp’ â tomba, io acchiappo ‘a croce e ve corro appriesso fino a mmiez’ â chiazza e vâ sòno nfronte nnanze a tutte quante e ve faccio fà na figura 'e niente! O si nnò v'aspetto all'inferno e là v’ ‘e dongo pe bévere e pe sciacquà cô furchettone dô primmo diàvulo che me capita pe nnanze.
(Entra Stefano infuriato e fa un giro intorno alla tavola senza guardare in faccia a nessuno.)
NANNINA: Stè, ch'è stato?
TONINO: Ce hanno sparato na tricchetràcche dint’ ô cazóne!
STEFANO: Cà ce amm’ ‘a fà ‘a croce câ mano sinistra!
TOTONNO: Ch'è succieso?... Pare che he visto 'o diàvulo!
STEFANO: Peggio!... Peggio!... Ué! 'O lupo cagna ‘o pilo ma nun 'o vizio! (Dà un pugno sul tavolo.) L'ignoranza è  na brutta bestia!... Diceva buono 'o nonno! “Mìttete appaura dê gnurante!... Songo 'e chiù periculose!”
NANNINA: (Ansiosa) Ma se pò sapè ch'è succieso?
STEFANO: Chella scema dâ zia Tattella sapite che va dicenno in giro?... Che io m'aggio pigliato cientemila lire quanno l'aiutaje a fà 'o trasloco!... Che io nu faccio niente pe senza niente!... Che io só fino fino!... Che corro sempe pecché esce 'a pezza (e indica i soldi con le dita della mano destra.)
PEPPE: (Per burlarlo) Però, oi Ste', tu 'a cientemila lire veramente tâ pigliaste! (Stefano annuisce.)
TONINO: Allora 'a zia Tattella have ragione!
STEFANO: Però nun va dicenno comme iettero 'e fatte!!!... Nun va dicenno che io l'aggio aiutata pe cinche iuórne!... Tutt’ ‘e pomerigge 'o posto 'e sturià o 'e me fà na bella passeggiata pê vie 'e fore6... Cinche iuórne a sagliere e a scennere dâ  copp’ ô scaletto... a muntà 'e mobbile, 'e lampadarie pe tutt’ ‘e stanze... pure dint’ ‘o cesso; a muntà 'o citofono, 'o campaniello, 'e quadre... pure l'attaccapanne dint’ ô curreturo7... Nun ‘e va cuntenno ‘e martellate 'ncopp’ ê dete!... Doje vote 'a scossa che putevo pure murì furmenato!... Chesto nun 'o va dicenno!!!
PEPPE: Ma chi te l’ha fatto fà?
TONINO: (Con ironia) 'A cientemila lire!
STEFANO: (Sospirando) Eh già!... 'A cientemila lire!
PEPPE: Faccio buono io che dico sempe che nu saccio fà niente!... Accussì nisciuno me vene a scuccià!... E campo ngrazie 'e Dio!... (Poi sentenziando) Tu he ‘a sapé  che quanto chiù faje pâ gente, peggio è!!! Na pugnalata a trarimiento nisciuno tâ leva... quanno meno t’âspiette.  E te pugnala sempe chi chiù he aiutato!...  E nisciuno s'allicorda 'e chello che tu he fatto!... Puó fà ciente cose bone, ma pe colpa d’ una sola fatta accussì accussì,  pierde tutto chello che he fatto!... 'A gente, quanno sta in obbreco cu tico8, va truvanno 'o pilo dint'a l'uovo pe te vutà a faccia!!!
TONINO: (Alludendo al fratello maggiore) He capito niente a zì Peppe!? Mo tenimmo pure 'o filosofo dint’ â casa!!!
STEFANO: (Continuando il suo racconto) L'urdemo juorno, mentre appennèvo 'o lampadario dâ cucina, 'a zia me mettette 'a cientemila lire dint’ ‘a sacca dô cazone... Io 'a vuttaje subbeto ncopp’ ‘a tàvula...
TONINO: Quanto sì fesso, fratello mio!... Câ carestìa che ce sta!
STEFANO:... ma essa m’ ‘a mettette n'ata vota dint’ â sacca. Io a vuttàrla ncopp’ ‘a tàvula e essa a metterla dint’ â sacca, n'ato poco...
TONINO: Se stracciava?!?
STEFANO: ...n'ato poco careva 'o lampadario nterra!... Â fine...
TONINO: (Con tono serio) Mi dovetti arrendere!
STEFANO:... â fine 'a cientemila lire  rummanette...
TONINO: (c.s.) Dint’ ‘a sacca!!!
STEFANO:... comme ha ditto sto fesso 'e fràtemo!... La dovetti prendere per forza!
PEPPE: E he fatto buono!
STEFANO: Ma nun è giusto che mo ‘o va dicenno a tutte 'e zie!
TOTONNO: E te preoccupe pe così poco?... Tanto 'e zie 'a sanno bona comme è fatta!
STEFANO: Ma io stasera, primma che parte 'a prucessione, vaco 'a casa e ce ‘a  sbatto nfaccia 'a cientemila lira!
TONINO: Accussì ce pierde 'a fatica e pure 'e sorde!
PEPPE: No! Nun 'o fà, Stè!... O si nno comme cê accattammo 'e tricchetràcche?... Facìmmece primma 'e feste ngrazie 'e Dio e po te vaje âppiccicà! 9
STEFANO: Doppo tutto chello che aggio fatto pe essa!... L'aggio servita pe tante anne comme ô prevete all'altare... Ogne vota che ce serveva na cosa, ce stevo sul'io!... Stè, me monte l'armadio? Pronto!... Stè, me aggiuste 'o rubinetto dô lavandino? Pronto!.. Stè, s'è rrotta 'a tapparella dô barcone!! Pronto!... Sempe pronto!... L’ate nipote nun esistevano pròpio!... E chesta è 'a ricumpensa?!?... L'aggi’ ‘a mettere doje déte ncanna!!!
TONINO: Sì! Accussì se rompono 'e dete!
NANNINA: Io tô dicevo sempe ch'è na fetente. Tu non m'he voluto maje crérere... Mo che vuó?... 'A prossima vota te impare!
TOTONNO: Stè, zìeta è stata sempe na carogna!...  Primma mangia  dint’ ô  piatto  tuojo e po ce sputa into. E' fatta accussì!... Basta conoscerla...
TONINO: E' come l'A.I.D.S.!  Se la conosci  non ti uccide!!!
TOTONNO: E' na vocca aperta. Quanno accummencia a parlà.  nun 'a finisce chiù!
PEPPE: (Interrompendo il padre) E' comme quanno tu lasce 'a funtana aperta. L'acqua scorre fino a quanno nun se sfratta 'o serbatoio... Glu-glu-glu-glu-glu-glu-glu... Se spanne pe tutt’ ‘a casa, po scenne pâ scalinata abbascio, arriva dinto a l'uórto e arracqua 'e pummarole, 'a ‘nzalàta…
TONINO: (Interrompendo il fratello) ... 'a vasenicòla, 'e fenucchie e… 'e citrulle comme a te! (Scappa.)
TOTONNO: (Continuando)  E nu sape  che ha da  nventà  pe se fà crérere...’O ianco ‘o fa niro e ‘o niro ‘o fa ianco!… E' capace 'e dìcere che Dio nun è Dio!...E po parla sempe male dâ famiglia...
TONINO: 'A merda sô leva da sotto 'e piere e sô mette nfaccia!
TOTONNO: Si ve cuntasse tutt’ ‘e schifezze che ha fatto, si putesse scrivere nu rumanzo...
TONINO: (Con ironia) Un best seller!
PEPPE: No, no, papà.  Lascia sta!...  Facìmmece 'a  vigilia 'e Natale ngrazie  ‘e Dio!... Aspettann’ ‘o Bambino è meglio a jucà â tómmola!
TOTONNO: 'O Padreterno, quanno ha creato 'a gente, quaccheduno  l'ha fatto buono  e  quaccheduno l'ha sbagliato a fà. Quanno ha fatto a zìeta, steva penzanno a n'ata cosa...
TONINO: E l'opera d'arte nun è venuta bona!
PEPPE: Non tutte le ciambelle riescono col buco!
TONINO: 'A prossima vota ce vaco io add’ ‘a zia. E si me vó dà 'e sorde, io mê piglio subbeto, quanno mê mette dinto 'a sacca. Mica só fesso comme a te!
STEFANO: (Rincorrendolo minacciosamente) Si t'acchiappo, te rompo l'osse!
TONINO: (Scappando) No, no, nun 'o fà, ià!... O si nno comme vaco, dimane, appriesso ô Maio? (Esce)
STEFANO: (Tornando indietro) Io nun aggi’‘a fà chiù niente pe nisciuno!… Manco si me pregheno in ginocchio!… (Tonino rientra camminando sulle ginocchia e con le mani giunte.) Manco si me taglieno ‘e mane!
TONINO: (Sempre in ginocchio, rivolgendosi al pubblico) Allora, sapenno cumm’è, avarraggio10 nu frate senza ‘e mane.
STEFANO: (Ancora una volta lo rincorre in modo minaccioso) Aaah! Ma allora t’aggi’ ‘a pròpio accìrere!… T’aggi’ ‘a taglià pròpio a lengua! (Tonino si rifugia in cucina. Stefano lo insegue. Si sentono urla minacciose di Stefano e implorazioni di Tonino.)
--------------------------------------------------------------------------------------------
1 sarcinielle = fascine di legna
2 dopporimane = dopo domani
3 se hann’ ‘a vulé' = si devono volere
4 o si no = altrimenti
5 chieiàte = con le spalle piegate  
6 p’ ‘e vie 'e fore = per le vie di campagna
7 curreturo = corridoio
8 cu tico = con te
9 âppiccicà! = a litigare
10 avarraggio = io avrò
-----------