Atto Primo: Scena Seconda

(Totonno va a sedersi vicino alla tavola. Estrae dalla tasca un mazzo di carte napoletane e comincia a fare un solitario. Si sentono delle voci che provengono dalle scale. Nannina, intanto, raccoglie il giornale mezzo bruciato e pulisce il pavimento.  Entra Stefano, il figlio ventenne, studente universitario.)
STEFANO: (Alludendo all’avvocato) Oi mà, che ce mancava mo?... ‘O sale o  ‘o pepe?
TOTONNO: (Senza girarsi)  ‘A sarza!
NANNINA: (Dà un’occhiataccia ad entrambi.) Io po vurrìa sapè pecché  ‘o tenìte ncopp’ â panza!...  Nuje tenìmmo na fortuna dint’ â casa e vuje ce sputate ncoppa.
STEFANO: Oi mà, ‘a fortuna è ‘a soja che ha truvato duje padrone ‘e casa fesse comm’a vuje!
TOTONNO: (Serafico, senza girarsi) Buone ‘e core, oi Stè... Buone ‘e core. No fesse!
NANNINA: Cu tutte ‘e conoscenze che tene, chillo (Indica il piano superiore.) nu juorno pò fà sistemà a te e a chillo fràceto ‘e fràteto Peppe.
STEFANO: Creritevéllo vuje!... Chillo (Indica anche lui il piano superiore.) con le sue conoscenze risolverà sempre e solo i suoi problemi!... P’‘a faccia nosta!… Chillo (c.s.) è tale e quale ai politici: pensano solo ai fatti loro e non fanno niente per senza niente!!!... Se ti vedono con il culo... (Occhiataccia dei genitori!)... pardon!.. con il sedere sulla strada, non ti lasciano crepare per terra solo perché tu gli puoi servire... Gli serve il tuo voto!... Altrimenti puoi schiattare!!!… Anzi ti passano con le ruote sulla panza!!! (Accompagnandosi con un suono idoneo, finge di essere travolto e schiacciato come una polpetta.)
NANNINA: Nu parlà accussì, che poco fa ha salvato ‘a vita a pàteto!
STEFANO: (Alludendo al padre) Che steva cadenno dâ coppa ô rivàno?
TOTONNO: (c.s.) Me steve abbrustolenno e l’avvocato, sprezzante del pericolo, si è lanciato contro le fiamme...
NANNINA: (Concludendo) ... e ha stutato ‘o fuoco!
STEFANO: (Con ironia) Ah! Mo tenimmo pure l’eroe dint’ â casa. He capito niente?! (Va in cucina.)
NANNINA: Totò, tu l’he ‘a ngiurià1 nu poco. (Indica Stefano.) Sta addeventanno troppo scustumato.
TOTONNO: Che ce vuó fà!  E’ nu guaglione. Va a l’università e ncopp’ ê libre legge che l’uómmene se fanno accìdere pâ giustizia, pâ libertà, pê penziére che téneno ncapa; cumbàtteno contro ‘e tiranne, contro ‘e fetiente, contro l’apprufittatore... E l’avvocato Caccavale, indubbiamente, è n’ ‘apprufittatore!... Nannì, mica è colpa mia si ‘e guagliune l’hanno capito buono!
NANNINA: Sì! Dacce corda pure tu!
TOTONNO: Se hanno ‘a mparà 2 ancora che dint’ â vita he ‘a sapé 3 apprufittà dê prufittatore... Famme fà, Nannì!... Nu poco â vota ‘e cunvinco io che l’avvocato nce serve!
(Entra Peppe, il primogenito, venticinquenne, dalla seconda porta a destra, con in mano la “Voce della Bassa Irpinia”)
PEPPE: Sì, pe nce fà speducchià 4 n’ato poco!
NANNINA: (Disorientata) Ma chisto è nu cumplotto vero e propeto!... Povero avvocato!
PEPPE: Oi mà, povere a nuje, che ‘o tenimmo sempe pe nnanze ‘e piére.
TOTONNO: Tu nu parlà!... Chillo (Indica anche lui il piano superiore.) è l’ùrdema speranza pe te truvà nu posto comme Dio cumanna!
PEPPE: (Scocciato di sentire sempre la stessa tarantella.) Aaaahà! Ma chesta è pròpio na fissazione, papà! Quante vote t’aggio ‘a dìcere che io ‘o posto nun ‘o voglio!... A me nu me piace ‘e fà l’impiegato... Nu me piace ‘e fà ‘o schiavo dô rilòrgio 5  ‘a matina, ‘o miezeiuórno e ‘a sera… Nu me piace ‘e tené nu capo che te sta sempe ncuollo. Nooò! A me me piace d’essere libero, ‘e faticà sulo quanno è necessario;  ‘e ji’ 6  a caccia o pe funghe;  ‘e ji’ fore, in campagna, quanno voglio io; ‘e turnà a casa quanno me fa còmmeto. E’ chiaro? Ah!... Io ‘o posto nun ‘o voglio!... ‘O vulite capì che a me  me piace ‘e fà ‘o zappatore!... ‘O contadino zappatore, comme dice Mario Merola! (Comincia a cantare la famosa  canzone napoletana “ ‘O zappatore ”.) “... Meglio si t’imparavo zappatore. ‘O zappatore nun s’‘a scorda ‘a mamma! ” (Abbraccia la mamma e le dà un sonorissimo e lungo bacio sulla fronte. Poi si rivolge al padre e, in tono scherzoso, continua a cantare.) “... Si zappo ‘a terra chesto te fa onore... Addenùcchiate e vasame sti mane! ”
(Allunga entrambe le mani al padre, il quale finge di lanciargli una pianella, mentre Peppe si fa scudo del corpo della madre per ripararsi.)
TOTONNO: Sto fetentone!
PEPPE: (Sempre nascosto dietro la madre) E po io addó m’appresento cu na primma media?
TOTONNO: Addó t’appresiente câ primma media?!?... Comme se vede che tu nu conosce ‘o munno, figlio mio!... Viene cà, che te conto na storia vera. ‘A storia ‘e chillo tipo che se pigliaje ‘o meglio posto ô Ministero cu na terza elementare, correnno appriesso a nu piezzo gruósso.  
(Nannina si mette la mano destra sulla fronte, sapendo come sono barbose le storie del marito e se ne va in cucina a preparare il caffè.)
PEPPE: Accussì facimmo mezzanotte!... ‘E conoscimmo ‘e storie toje!  (Fa un gesto di scocciatura.) Quanno tu accummence,    nâ finisce chiù!
TOTONNO:  Quanto sì  antipatico!!! Pure ‘a vigilia ‘e Natale! Quanno facìte accussì, beh nu saccio che facesse!
PEPPE: (Accarezzando il padre e abbracciandoselo da dietro) E va buono, jà! Accuntentammo a paparino!... Sentimmo sta bella storiella!
TOTONNO: (Categorico, con l’indice puntato contro il figlio e con dire dotto) VA ADDERÈTO, SATANA!!! (Peppe resta sorpreso all’insolita  reazione del padre.)  Mo nun tâ voglio cuntà chiù!
PEPPE: Io manco ‘a vulevo sentì! (Gli gira le spalle ed esce dalla stessa porta, saltellando e dicendo tra sé ad alta voce) Ce simmo salvate pure ogge!    
TOTONNO: (Lanciandogli una pianella) Stu figlio ‘e càntaro7!... Primma ‘e crisce e po te sfotteno pure! He capito niente?... E io me faccio ‘a capa fràceta pe penzà comme aggio ‘a fà pe le truvà nu bello pustariello!... (Entra Stefano, si appoggia alla porta della cucina ed ascolta la predica del padre.) Só  trent’anne che tengo ‘a tessera dô partito. Nu me perdo nu cumizio. Sempe annanze a tutte a scuccà ‘e mane...
STEFANO: (Con mimica appropriata) Comme a nu fesso!
TOTONNO: (Dà un’occhiataccia al figlio e continua) E mê sento fino a l’ùrdemo, pure quanno me fanno vutà ‘o stòmmaco!... Aggio vutato sempe ‘e nummerielle8  che me ‘nfilaveno dint’ â sacca dâ giacchetta: “ 1-5-6-7 ” ... “ 1-2-3-4 ” ... “ 1-3-15-18 ” !... E fosse niente tutto chesto!... Ogne anno vaco a putà ‘o giardino dô Sìnnaco, l’uorto dô miéreco9, ‘e prune10 dô Segretario... E senza ‘e me piglià maje na lira, eh!
STEFANO: (Avvicinandosi al padre) E male he fatto, babbo mio! (Accompagna l’espressione con il classico gesto per definirlo “babbeo”!) Il tuo caro miéreco, invece, se piglia cientomila lire â visita e dagli amici settanta... mila... lire... aggiungendo: “Pecché sì tu!”... Ogne sera se mette in saccoccia due o treciento mila lire... (pâ faccia nosta!)... pulite pulite! E non ci paga neanche le tasse!... Tu, invece, fatiche gratis comme a nu cane e io po nu tengo maje na lira ncuollo... mentre ‘e figlie ‘e chesta gente ogne sera iètteno ‘e carte ‘e diecemila lire dint’ ô bar ‘e Ziuccio... e tutto ‘o juorno passeno e spasseno cô mezzo pâ chiazza ncoppa a na rota sola. (Imitandoli) Wroom!... Wroom!... Wroom!... Fanno cinquanta gire attuorn’ ô monumento facenno mangià ‘a póvere11 e ‘o fummo a tutte quante, sott’ô naso dê vigili... cosiddetti... urbani! (Finge di mettere in moto una motocicletta e gira intorno alla tavola.) Wroom!... Wrooooom!... Wrooooooooom!
(Totonno lancia l’altra pianella a Stefano che scappa in cucina per non farsi colpire. Intanto arriva Nannina con due tazze di caffé, senza vassoio.)
NANNINA: Chiano, chiano, che cade ‘o café!
(Dà una tazza al marito, poi va a sedersi. Bevono sorseggiando, mentre Stefano, furtivamente, raccoglie le due pianelle e le lascia cadere ai piedi del padre. Poi prende un libro sul ripiano della credenza e si avvia verso le camere.)
TOTONNO: Ma cu chi l‘he fatte sti duje figlie ‘e ndròcchia12, ne Nannì?
STEFANO: (Senza girarsi) Se vede che ‘a semmenta nun era bona! (Scappa.)
TOTONNO: Nun era meglio a crescere duje belle purcielle? Accussì le accidévemo13  e ce facévemo ‘a nzogna chê supressàte14 pe vierno!
NANNINA: (Ridendo) Accussì cê mangiàvemo ncopp’ a Gesù e Maria e a Fontana Vecchia15 !
TOTONNO: (Alzandosi) Io vaco a veré si Fanina16 ha preparato ‘o presepio e si ha truvato ‘e torce pâ prucessione ‘e stanotte.

NANNINA: Accatta doje tricchetràcche! ‘E creature vonno sparà quanno passa ‘o Bambino pê Vesune17!
TOTONNO: (Con aria soddisfatta) Chelle ‘e tengo già ‘a nu mese... Voglio accattà duje biancale.
NANNINA: (Mentre va in cucina con le tazze) Accatta chille ‘e tutte ‘e culure!
(Totonno si mette il giaccone ed il cappello ed esce.)

1 tu l’he ‘a ngiurià = tu lo devi ingiuriare
2 Se hanno ‘a mparà =  devono imparare
3 he ‘a sapé = devi sapere
4 speducchià= derubare
5 d’ ‘o rilòrgio = dell’ orologio
6 ‘e ji’ = di andare
7 càntaro = vaso da notte
8 ‘e nummerielle = i numeri dei candidati nelle liste elettorali
9 miéreco = medico
10 ‘e prune = i prugni
11 póvere = polvere
12 ndròcchia = prostituta
13 le accidévemo = li uccidevamo
14 supressate = piccolo salame assai compresso, legato con spago
15 Gesù e Maria e Fontana Vecchia sono due località montane vicino a Baiano, entrambe con chiesetta, dove si usa fare scampagnate il martedì ed il mercoledì dopo Pasqua
16 Fanina: Signora Pradal. Per tradizione, come già prima di lei faceva il padre Pellegrino ‘o capone,  prepara nel suo cortile la capanna con il Bambino per la processione di mezzanotte.
17 Vesune = un quartiere del centro storico di Baiano
-----