Accussì ha deciso ‘o Pateterno!
Toc toc! San Piè, arapìte.
Che vuoie? me dice.
Comme che voglio? Facìteme trasì.
Sto a ddoje ore aspettanno annanze â porta.
Ma tu chi sì?
Pecchè nun me conosci?
Songo ‘o prussore Montella!
Songo ‘e Baiano.
A Cicciano me conoscono pure ‘e prete d’ ‘a strada!
Me dispiace! Ma ccà nun ce sta posto pê pover’omme!
Ma che dicìte, San Piè?
Io so stato sempe na brava persona,
‘e core e chino ‘e buone sentimente.
Sempe pronto ad aiutà ‘e debbule,
sempe leale e generoso,
aggio dato ll’anima â gente,
pure a chi nun s’ ‘o mmeritava!
Comme sarebbe che mo’
nun ce sta ‘o posto pe me?
Sì, cca ‘o sapimmo che haje dato l’anema â gente,
ma na cosa tu nun haje saputo fa
e perciò nu può stà cca!
Te ne he ‘a ì!!!
San Piè, forse ce sta nu nguacchio!
Forse me state scagnanno cu n’ata perzona.
Ce stanno tanta Montella ncoppa â terra!
Ma tu sì Carmine Montella? Nato a Baiano?
‘O figlio ‘e Ntonio ‘o luongo e ‘e Maria d’Avella?
Sì!
Allora sì proprio tu. Sì nu pover’omme
e perciò tu nu può stà cca!
Ma comme? Io che penzavo…
No, tu nun he ‘a penzà… He ‘a smammà!
senza dìcere na parola!
Accussì ha deciso ‘o Pateterno!
(Baiano: Settembre 2002)