Inno alla Vergine Maria
Ave, o Vergine Maria,
che sì addiventata mamma ‘e Gesù
pe nu miraculo ‘e Dio
a Betlemme dint’ ‘a na stalla,
addò ‘e Magi s’addenucchiàjeno
ntramente l’angiulille cu ‘e cante
cummigliàveno ‘e chiante d’ ‘o Piccerillo
e d’ ‘a terra ‘e frutte purtaveno ‘e pasture.
P’ ‘e cristiane Tu sì n’esempio
pecché senza paura ncopp’ ê spalle
‘e na missione divina pigliaste ‘o peso
sapenno che ‘o Figlio addiventava Re
‘e nu regno senza fine.
O Maria Immacolata, Tu che staje ncielo
mo’ he ‘a aiutà l’uommene d’ ‘a terra
d’ ‘o male che saglie sempe ‘e chiù
e d’ ‘a pazzaria ‘e chi accide cu ‘o nomme ‘e Dio.
Ferma chist’odio che tene n’ommo contro a n’ato,
accussì tutti venarranno a Te ringrazià
e l’ate chiese custruarranno pe Te pregà.
Tu che aje avuto na ferita mpietto
nterra â croce p’ ‘o Figlio che mureva
p’ ‘o dulore che T’ave stracciato ‘o core,
mo’ T’he ‘a piglià ‘e lacreme ‘e chi soffre
pe cunzulà chi manco ‘a speranza nu tene chiù
e pe dà n’aiuto a chi è misero
o vive dint’ ô fango d’ ‘a povertà.
Accussì Tu, o Madre Madonna,
che he magnificato ‘o Signore nuosto,
sarraje chiammata pe sempe BEATA!
(Baiano, 15 Febbraio 2017)