Stelle cadenti
Che bellu cielo stanotte ncapo a me.
Aggi’ ‘a cuntà tutte ‘e stelle
a una a una senza ‘e ne lassà nisciuna,
m’aggi’ ‘a sazià, m’aggi’ ‘a regnere ll’uocchie
e pe ognuna che cade câ coda
aggi’ ‘a penzà a na cosa bella.
Quanta sfizie allora m’aggi’ ‘a fà passà.
‘A vi’ canno ‘a primma cu na scia longa longa!
Famme penzà!... Famme penzà!
Aggio penzato! Ecco!
Tutte ‘e vote che passo pâ via
me sento ncuollo ‘e parole
‘e chella nciucera ‘a fora ‘o vico
che sta sempe là pronta
a sparlà ‘e chisto e ‘e chella.
L’he ‘a fà seccà ‘a lengua ncanna,
se l’ ha da gliòttere, s’ha da affugà!
Embè… embè… eeeh embè!
Quanno ce vò… ce vo!
‘A vi’ loco n’ata chiù bella ancora!
Famme penzà!... Famme penzà!
Aggio penzato! Ecco!
Sta na signora sempe ncoppo ô barcone
matina, miezejuòrno e sera
e nu fà passà nisciuno liscio;
sape ‘e zelle ‘e tutte quante.
Embè! N’he ‘a fà cadè ‘o barcone!
Chistu piacere m’he ‘a fà.
Embè… embè… eeeh embè!
Quanno ce vò… ce vo!
Uuuuh! Che furtuna! N’ata stella!
Famme penzà!... Famme penzà!
Aggio penzato! Ecco!
A l’angolo d’ ‘a strada
int’ â na casa senz’aria e senza luce
ce sta na povera disgraziata
che vatte sempe ‘o piccirillo.
Pe ogne cosa nu schiaffone
e se chiagne pe jonta ‘e ruotolo
le fa cadè ‘e diente cu nu papagno nfaccia.
Embè! L’he ‘a fà ciuncà ‘e mane,
accussì se mpara a fa ‘a mamma.
Embè… embè… eeeh embè!
Quanno ce vò… ce vo!
Aaah! Chesta è proprio na bella stella!
Ce vò allora nu bello penziero!
Famme penzà!... Famme penzà!
Aggio penzato! Ecco!
Cu tutto ‘o rispetto p’ ‘a Juve,
ma quanno Higuaìn vene a iucà a Napule
l’ha da venì na moppeta ‘e panza…
na cacarella longa longa longa
ca l’ha dà durà pe tutta a partita
e l’ha da scorrere p’ ‘e cosce abbascio
fino a dint’ ‘e cazettine!
Embè… embè… eeeh embè!
Quanno ce vò… ce vo!
E mo basta, ià. Facimmo nu bello penziero
cu sta stella che vene ‘a luntano.
Vurria na cosa pe vuje, na cosa sola:
na bella salute senza penziere
e nu poco ‘e ammore…
chello che basta pe essere felice!
Embè… embè… eeeh embè!
Quanno ce vò… ce vo!
(Agosto 2016)