Core azzurro
Ce sta ‘o mare azzurro e ‘o Vesuvio,
San Martino, Pusilleco e Marechiaro,
‘e chiazze belle cu ‘e chiese antiche,
‘e vicule cu ‘e vasce senza ‘o sole,
‘o Cristo velato e San Gennaro,
‘e pasture dâ storia ‘e Napule,
‘a pizza, ‘o cafè e ‘o babbà,
‘a gente cô core gruosso
pronta subbeto a t’aiutà,
Totò e Tina Pica che déveno ê puverielle
‘a sustanza pe mettere ‘o piatto a tavula,
Viviani, Di Giacomo e De Filippo,
‘a voce ‘e Caruso, Murolo e Carosone
e ‘o cielo ca se spanne ncopp’ ‘e case
comme a nu lenzuolo frisco ‘e culata.
Cu tutto chesto bene ‘e Dio
puteva maje mancà na squadra ‘e pallone?
Nascette accussì na cosa bella
ca vulette ‘o ciuccio pô viaggio
e Diego p’ ‘a gloria eterna.
Da Furcelle e Porta Nolana,
da Chiaia e ‘o Vommero
a pere o cu ‘e mezze
a ciento a ciento a vedè ‘e partite
câ speranza ‘e na vittoria.
P’ammore e ‘a passione dâ gente
che pe na palla darria ‘a vita,
sì carogna si pe essa nu faje ‘o tifo.
«AH SI PUTESSE DICERE CHELLO C' 'O CORE DICE,
DICISSE: ETERNAMENTE VOGLIO RESTÀ CU TE! (Eduardo De Filippo)»
Guagliù, fra poco accummincia ‘a partita:
dicitencello vuje ca ‘a città ‘e Pulecenella
tene anema e core pe tuccà ‘a luna rossa!
Aizzammece e alluccammo cu tutta ‘a voce:
“Forza Napule! Sempe!”