Elezioni comunali
Na sera ‘e maggio verso ‘e nnove.
Toc! Toc!... Chi é?
Songo ‘o quatto,
porto pure ‘o sette
e ‘o diciannove.
Trasite! Trasite!... Se vulite favorire...
No, no! È ampréssa pe mangiá!
Dicite! Dicite!
Io vulesse fà ‘o cinema,
‘o campo, ‘a pista d’ ‘e bocce
e ‘a chiazza nova!
E pe fà chesto m’ avit’ ‘a vutá’!
‘A casa mia po é sempe aperta!
‘0 quatto vene eletto,
festeggia ‘a vittoria
e nun se fà chiù vedé!
Sale e scenne ogne matina
ncravattato e ndaffarato,
dice e fà sott’ ‘o comune,
parla ride nsacca e port’ â casa:
é arrivato ‘o mumento pe mangiá!
Doppo cinche anne
na sera ‘e maggio verso ‘e nnove.
Toc! Toc!
Chi é?
Songo n’ata vota ‘o quatto.
Mo peró porto ‘o tre
e ‘o diciassette!
Dicite! Dícite!
Sapite? Vulevo fà
‘o cinema... ‘o campo ...
‘a chiazza nova ...
Vulevo fà tante ccose
ma nun me l’hanno fatte fà!
Ce vonno chiú voti
pe essere chiù forti.
Vutatemi tutti quanti d’ ‘a famiglia
e io ve prumetto che sta vota
ve faccio ‘o paese nuovo!
L’aje sentito, mugliera mia?
Vuleva ... vuleva ...
Ma nun ha fatto niente!
Chillo nu sapeva fà
‘o chirchio manco c’ ‘o bicchiere.
Ha penzato sulamente
a s’ abbuffà...
a se régnere ‘a panza.
Ha dato ‘o posto ô frate,
ô nepote e ô cainato,
e ha aizáto n’atu piano
ncopp’ â casa.
E mo che facimmo, marito mio?
Ce ‘o dammo ‘o voto?
Sì, mugliera mia.
Vutammo ‘o quatto,
‘o tre e pure ‘o diciassette.
Peró...
e chell’ ata lista!
(Baiano, Giugno 1994)
(Quando si votava esprimendo 4 preferenze!)