'O miédeco sinnaco

“Presto! Presto! Curre!
Va a chiammà ‘o miédeco!
Ninnillo nun se sente buono!”
Zompo ncopp’ â bicicletta
e c’ ‘o core ncanna arrivo
ô studio d’ ‘o miédeco.
Nun c’è nisciuno,
meno male,
accussì ‘o faccio venì subbeto a casa.
Toc!… Toc!… Nu risponne!
Mannaggia! E mo addó sta?
Starà ô comune!
Senza ‘e me perdere ‘e curaggio
vaco â chiazza,
faccio ‘e scale  a doje a doje
e busso â porta ‘e tutt’ ‘e stanze.
“Mo steva cà!…
Nu minute fa l’aggio visto!…
Sarà ghiuto ô studio!”
Zompo n’ata vota ncopp’ â bicicletta
e c’ ‘o core ‘ncanna arrivo ô studio.


Toc!… Toc!… Nu risponne!
“Mo steva cà!…
Sarà ghiuto n’ata vota ô comune!”
“Steva cà!… Steva là!…
Uffà! E mo addó cazzo ‘o trovo sto miédeco!
Mannaggia a capa soja
che s’è mmiso a fà ‘a pulitica!
E mannaggia a capa mia
che l’aggio pure vutato
p’ ‘o fà sinnaco!””

Afflitto, stanco e scunzulato
torno ‘a casa  add' ‘o ninnillo!
“Maronna mia, speriamo che sta meglio!”
me dico ciente vote p’ ‘a via.
E ‘a Maronna m’ha fatt’ ‘a grazia!
‘O trovo janco e russo
ncopp’ ‘o lietto
che zompa e vola
comme a nu fringuello!
“Era nu male ‘e panza!”
me dice muglièrema
tutta felice.
“Ha fatto doje pèrete
e le è passato!”

(Baiano: 5 Agosto 2004)