L’erba del vicino
“L’erba del vicino è sempre più verde!”
Ma quanno maje? E chi l’ha ditto?
Si vede che nun avite maje
assaggiato chella ‘e casa vosta
cô prufumo e chê culure
che sulo là stanno!
Addu me è overo ,
‘o prato è nu poco spellecchiato,
‘a siepe nu tene chiù ‘e fronne,
pure ‘e piante se stanno seccanno,
però….
Però – eeeh! –
‘e cane mieje sò felice
‘e correre annanze e arreto,
l’aucielle cantano dâ matina â sera
ncopp’ ê reame dâ magnolia,
‘e gatte pigliano ‘o sole ncopp’ô tetto,
‘e sciure te regneno l’anima
e po…
e po ce sta l’ammore
dint’ô ciardino ‘e casa mia
che vale chiù ‘e na miniera d’oro!
Ce sta ‘a mano ‘e muglierema,
‘o tocco magico che sul’essa tene!
‘E rose, ‘e belle di notte, ‘a lavanda,
‘a triconda, ‘o prato inglese, ‘a mortella,
petale gialle, russe, viole, turchine…
n’arcubaleno ‘e culure!
Aaaah! Sentite a me!
L’erba ‘e casa mia
è chiù bella ‘e chella dô vicino!
(Baiano, 26 Agosto 2015)