Malafemmena
Quanno torna a casa
stanco e muorto ‘e famma,
desideroso ‘e truvá
nu poco ‘e pace,
‘o calore ‘e na famiglia
e doje figlie ca l’abbracceno,
arápe ‘a porta, ‘o puveriello,
e chi vede?
Na femmena arraggiata
cô tuósseco a le dá!
Teccatillo ‘o riposo, tè!
Sô ggira tuórno tuórno,
sô ‘rravóglia e sô babbéa
e le fa perdere ‘a ragione,
le fa crérere
che ‘o bianco é niro
e ‘o rrusso é blu!
E isso, povero Cristo,
ca nun ha avuto manc’ ‘o tiempo
‘e respirà, ‘e se guardá attuórno,
‘e se lavá nu poco ‘a faccia,
‘e se mangiá na fella ‘e pane,
manc’ ‘o tiempo ‘e se fa ‘a croce,
se trova cu l’ati penziere
ca ‘o stonano ‘a capa
e accummincia a sbariá.
Che inferno accussì é ‘a casa,
chiena ‘e fuoco e senz’ammore:
nun é ‘o puorto pe na nave
contr’ ‘o viento e ‘a mareggiata!
‘A notte ‘o suonno nun arriva!
Se vota e se revóta dint’ ô lietto
senza chiudere uocchie
mentre ‘o mmale trase
e s’ampusséssa dô cumando.
Chesta é ‘a vita se ‘a na malafémmena
te lasce ncappucciá!
(Baiano, 30 Gennaio 1994)