‘O male primma o poi sempe torna
Pe vummecà ‘o veleno dô stòmmaco
ncuollo a nu cristiano
basta ‘a schifenzìa che uno tene dint’â ll’anema.
Nun ce vò l’arca ‘e scienza
pe truvà ‘e parole juste
chiù forte ‘e nu martiello:
basta sbacantà ‘o sacco chino ‘e scupatura
e mettere nzieme tanta arraggia.
Pô silenzio overo ce vò
tutta ‘a forza dô cereviéllo
chiù putente ‘e ciento schiaffe
ca lasciano nu segno nfaccia
futo comme fa n’aràto nterra.
Fa chiù male na parola che nun se dice,
na risposta ca nun se dà.
Chi è ca nu sape accucchià
quatto penziere pe lavà n’offesa?
Ma po’ uno penza
ca nun vale ‘a pena
a sciupà ‘o sciato e a perdere ‘o tiempo
appriesso a chi tene ‘o curtiello sempre mmano.
Tanto ‘o male primma o poi
sempe torna a chi ‘o fa!
(Baiano, 17 luglio 2022)