Rimprovero di Santo Stefano ai suoi fedeli di Baiano
We! Comme è addiventato ‘o popolo mio!
Me chiedono tanta grazie
nu dico tutt’ ‘e juorne
ma ê vote pure nu juono sì e nu juono no
e po a dicembre, a febbraio e âusto
me portano a spasso p’ ‘o paese
e se io nu vaco dint’ â tutte ‘e vie
anema d’ ‘a maronna!
chilli sò capace ‘e nu dà manco na lira
si nu trase dint’ â casa lloro!
E ce sta chillo c’aspetta ‘a bandiera
pe se fa vedè a tutte quanta
quanno appenne ‘e quatto perucchie.
Nu capisceno propio ca io tengo duemil’anne
e pe tutte ‘e prete ca me àveno vuttato ncuollo
tengo l’osse rotte!
E che diavulo! Nu poco ‘e comprensione!
Niente!
Io aggi’ ‘a jì casa pe casa
aggi’ ‘a bussà purtone pe purtone
buco pe buco
mannaggia â capa vosta!
Si ‘o veneno a sapè ‘e pate vuoste
chilli sò capace ‘e zumpà fora â fossa
pe ve dà na croce nfronte.
E pe nu dicere po chello che facite
ogne anno ‘o juorno ‘e Natale.
«Evviva ‘o Maio ‘e Santu Stefano!»
e io tutto ca me cunzolo.
Ma po doppo manco nu poco sento ‘e lluccà:
« Io mo ‘o taglio!»
«Io nun ‘o faccio scennere d’Ârciano!»
«Io me mecco annanze e nun ‘o faccio passà!»
«Io mo piglio ‘o motosega
e ‘o faccio a mille piezze!»
We! Oooooh! Scusateme tanto.
Ma si vuje avit’ ‘a fà ‘o Maio
cu chisti penziere,
c’ ‘o facite a fa?
Purtatelo a Santa Filumena,
purtatelo a Sant’Elia
ca songo amice mieje.
Mo ve chiudo propio ‘a chiesa
e v’ ‘o faccio aizà senza ‘e me
sulo pe pazzià
e nun v’ ‘o benedico!
E nu me venite a scetà ‘a matina
d’ ‘e messe ‘e notte
ca è meglio ‘e stà sott’ ‘e cuperte!
E mo si me vulite bene.
metteteve a squadra
e jateve a cunfessà tutte ‘e peccate.
(Baiano, 20 agosto 2024)