E' sempe ‘o meglio che se ne va!
E’ sempe ‘o meglio che se ne va!
L’aje saputo? E’ muorto Nicola ‘o panzavacante.
Frisca l’anema soja!
L’hanno truvato tiseco tiseco ncoppa ô lietto.
“Era ‘o meglio!”, diceno ‘e cumpagne ‘e marenna.
Sì, ‘o meglio... ‘O meglio dê mariuole!
Chillo arrubbava ‘e sorde pure dint’ â sacrestia!
Frisca l’anema soja!
‘O saje? E’ muorto pure Pascale settebellezze!
Frisca l’anema soja!
“Era ‘o meglio!”, diceno ‘e femmene.
Sì, ‘o meglio... ‘O meglio dê sfaticate!
Chillo nun ha fatto maje nu iuorno ‘e fatica.
Sempe annanz’ ô specchio a s’ammirà,
a s’alliscià ‘e capille e ‘o mustaccio!
Frisca l’anema soja!
M’hanno ditto che l’atriere è muorto ‘o bambacione
abbascio ô vico dê muorte ‘e famma.
Frisca l’anema soja!
“Era ‘o meglio!”, diceno ‘e vicine ‘e casa.
Sì, ‘o meglio… ‘O meglio dê battilocchie!
Nu sarchiapone e nu totaro messe nzieme
che nun appareno uno buono!
Frisca l’anema soja!
Guaglù, avite letto ‘o manifesto?
E’ morta chella figlia ‘e ntrocchia ‘e Cosciastorta!
Frisca l’anema soja!
“Era ‘a meglia!”, diceno l’uommene dô quartiere.
‘A meglia?... E già! Chella ‘e faceva cunzulà!
‘A purtava sempe ‘a fora pâ fa piglià aria!
E ‘a metteva sempe a disposizione ‘e chi bussava!
Frisca l’anema soja!
Mo però, dich’io, se tutte ‘e fetiente
quanno moreno addeventeno sante
e vanno mparaviso câ carruzzella,
allora nuje che avimmo filato sempe dritto,
nuje che tenimmo ‘a cuscienza a posto,
nuje che â matina iammo a faticà
e â sera facimmo pure na preghiera…
vurria sapè nuje che fine facimmo?
Chi simmo? ‘E scieme dâ cumpagnia?
Meno male che ‘o Pateterno vede e provvede,
‘e scieme nê vò cu Isso ncielo,
e ce lascia ncopp’ â terra a campà pe ll’ati ciente anne!
(Baiano, 26 Settembre 2014)