Scambiatevi un segno di pace!
“La pace del Signore sia sempre con voi,”
dice don Ciccio ‘o prevete dâ coppa a l’altare.
“Scambiatevi un segno di pace!”
E tutte se danno ‘a mano dint’ â chiesa
pe stregnere nu patto ‘e fede.
E po?... E po… eh eh!
E po ‘e curtièlle só sempe affilate
e nisciuno se muzzeca ‘a lengua!
‹‹ ’O saje? Nicola fa ‘e corne â mugliera! ››
‹‹ Aje visto comme sâ tira Nannina! ››
‹‹ Se crere che ‘a tene sul’ essa! ››
‹‹ Vire là! Vire là! Chella è spusata
e se veste comme a na giuvinottella! ››
‹‹ Sâ puteva mettere chiù corta ‘a vunnella! ››
‹‹ Quasi quasi se vede ‘a… Famme stà zitto, va,
o si nno faccio peccato! ››
“Preghiamo! Agnello di Dio,
che togli i peccati del mondo,
abbi pietà di noi!”
‹‹ Ajere Cuncetta (we, cà ‘o dico e cà ‘o nego!)
purtaje nu canisto ô prussore dô figlio!
L’aggio vista cu l’uocchie mieje! ››
‹‹ E che ha da fà na povera mamma!
Chillo sta sempre a mpennà ncopp’ ô mezzo
o posto ‘e penzà a sturià! Wroom! Wroom! ››
‹‹ Aje sentito ‘a voce che gira pô paese?
‘O figlio ‘e Peppe nun sâ sposa chiù a Reginella! ››
‹‹ E fa buono!... Chella è proprio na…. ››
‹‹ Zitto, nun te fa sèntere che stammo int’ â chiesa! ››
‹‹ Vurria sapè chillo che tene ‘a guardà!
Si guarda n’ ato poco, vaco e le rompo ‘a faccia! ››
‹‹ ‘O figlio dô vicino mio mette ‘a radio
che te stona sempe pure ‘e notte.
Quacche juorno vatto ‘o pate e pure ‘o figlio! ››
“Vi benedica Dio onnipotente, Padre e Figlio e Spirito Santo.”
“Amen.”
“La messa è finita: andate in pace.”
“Rendiamo grazie a Dio.”
‹‹ Mo che ascimmo ‘a fora, t’aggiâ dicere n’ ata cosa! ››
‹‹ Sì! Sì! Famme sèntere! Famme sèntere! ››
‹‹Cannetella va dicenno a tutt’ ‘a gente
che ha da mettere doje rete ncanna â socra!
(n.d.r. Sfumando)
We, chella nun se fa maje ‘e fatte suoje,
pare ‘a vammàna ‘e Furcella! ››
Allora che aggi’ ‘a dicere io pe chiudere ‘o fatto?
Mica sulo mmiez’ â chiazza si fanno ‘e nciuce!
Pure chi va â chiesa in nome dâ pace
tene ‘a lengua affilata comme a duje curtielle
e ‘o nciuciero nun se fà maje ‘e fatte suoje!
Ha da nciucià o si nno nu po’ campà!!!
(Baiano, 26 Agosto 2014)