Simmo tutte uguale
“Simmo tutte uguale!”
Simmo tutte uguale?
Manco ‘e cane!
Io sarria uguale a Cenzino e a Peppe
che nu sanno ’a do scenne ‘o pane?
Uguale a Niculina o a Pascale
che nu teneno genio manco ‘e se sputà nfaccia?
Uguale a Fanina o a Ntonio
che hanno sempe campato ncopp’ê spalle ‘e l’ate?
Uguale a Carmeniello o a Vicienzo
che nu sanno fa ‘o chirchio manco cô bicchiere?
Uguale a Saverio e a Peppinella
che â scola nun hanno maje aperto nu libbro?
Uguale a tutte chilli che hanno arrubbato,
che s’hanno arruffianato e hanno alleccato?
Nooooo! Allora io nun so chiù nisciuno!
Che brutto munno sarria accussì!
Simmo tutte uguale?
Che male aggio fatto pe merità sta sciòrta!
Io me sòsevo ê cinche â matina pe sturià
e mo sarria uguale a chi durmeva
comme a nu fraceto fino ê diece dint’ ô lietto?
Io faticavo dâ matina â sera
e zappavo pure ‘a terra cu patemo
e mo sarria uguale a chi s’arrattava ‘a panza
e passava ‘a jurnata sempe mmiez’ â chiazza?
“Simmo tutte uguale!”
Simmo tutte uguale?
Io nun ce pozzo propio credere!
“Considerate la vostra semenza:
fatti non foste a viver come bruti,
ma per seguir virtute e conoscenza"
scrivette int’ a l’Inferno il sommo poeta ‘e Firenze.
Ma tu qua semmenta e semmentella?
Cà ce sta chi se ne fotte dâ virtù
e chi ce mette ‘o penziero pe se mparà!
Ce sta chi sturèa pe addeventà re
e chi penza sulo ê palle dô bigliardo!
“Simmo tutte uguale!”
Simmo tutte uguale?
Ma allora ‘e figlie mieje ponno fà
‘e stesse cose dê figlie dê macchiavielle,
dê nobbele e dê mastuffacenne?
Ponno sturià â Bocconi ‘e Milano senza sfuorze,
ponno ì in vacanza a Sharm el-Sheikh
câ barca ‘e diece metre câ bandiera panamense
o int’ a n’hotel a cinche stelle
cô l’idromassaggio int’â cammara,
ponno sfreccià cu na Ferrari rossa e sfolgorante,
ponno ì a scià a Cortina o a Courmayeur
a Pasca, a Natale e ô primmo ‘e Maggio,
ponno tenè nu cunto in banca
e ponno fà chello che nun te suonne!
E vuje ce credite a sti fantasie, è overo?
Io no! ‘E suonne mê faccio sulo ‘e notte!
Io saccio una cosa che mâ mparato ‘a vita:
si scoppia na guerra figliemo va in trincea
ma ‘e figlie ‘e chilli là stanno sempe adderèto.
Po si esce nu bello posto ‘e lavoro
‘e figlie ‘e chilli là stanno sempe annanze
e figliemo resta â casa a cuntà ‘e perucchie.
E quanno se tratta ‘e piglià ‘e mazzate
ce fanno ‘e curdone ncopp’ ê spalle,
quanno se tratta ‘e spàrtere
a nuje ce tocca sempe a peggia parte!
Sta cosa proprio nun va!
Perciò sentite a me: nuje?
Nuje propio nun simmo tutte uguale
ncopp’ â stu munno nfame!
Ognuno se nne va pâ strada soja,
pe chella che ‘o Pateterno ce ha assignato
e arrecatta chello che semmena!
(Baiano, 25 Agosto 2014)