Poesia per mia moglie
Aggio scritto poesie pô cane, pô gatto, pô ciuccio,
pô mulo, pô puorco, pô vallo e pâ vallina…
ma pe moglierema no!
Aggio scritto poesie pe mammema, pe patemo, pe figliemo,
pe nonnemo, pe muorte e pe vive…
ma pe moglierema no!
Aggio scritto poesie pe Silvano, pe Fioldisa, pe Saverio,
pe Sylvia, pe Luisa, pe l’amice e pe nemice…
ma pe moglierema no!
Aggio scritto poesie pô Padreterno, pâ Maronna,
pô Bambiniello Gesù, pâ chiesa e pô diavulo;
pâ politica, pê mariuole, pê mangione…
ma pe moglierema no!
Aggio scritto poesie pô sole, pê stelle, pâ luna, pô cielo;
pê piante, pê sciure, pô mare,
pe l’acqua, pô viento, pâ neve…
ma pe moglierema no!
Aggio scritto poesie pe Baiano, p’ Avellino e pe l’Italia;
nun ce sta pizzo dâ Terra
che nun aggio pittato câ penna e cô penniello…
ma pe moglierema nun aggio scritto na parola!
Aggio scritto poesie pe tutte ‘e cose dô munno
e m’aggio scurdato ‘e muglierema secondo vuje?
Songo nu marito senza core e câ capa dint’ê nuvole?
Ma no! Nun è accussì comme pare a vuje!
E mo vô conto chiano chiano, pilo pe pilo.
Quando muglierema brucia ‘e fasule dint’â pignata
o quanno â sera me scarfa ‘e maccarone dô miezeiuorno
e io “Nun fa niente, cê mangiammo accussì”, le dico…
si nun è poesia chesta, diciteme vuje cos’è?
Quanno ‘a pasta è crura o è scotta
o quanno porta ‘a nzalata senza ‘o sale
e io mâ mangio ‘o stesso senza dicere na parola…
si nun è poesia chesta, diciteme vuje cos’è?
Quanno se scorda ‘e me fà ‘a chieva sott’ô cazone
e io cu na santa pazienza mô giro e mô metto
o quanno trovo ‘a camicia senza stirà
e io penzo “Ha tenuto da fa!”…
si nun è poesia chesta, diciteme vuje cos’è?
Quanno io passannole vicino
le metto ‘a mano ncoppa ‘e … ncopp’ô fondo schiena
(io in verità ‘o chiammo ‘e n’ata manera!)
e mâ manèo cu tanta dulcezza
si nun è poesia chesta, diciteme vuje cos’è?
Quanno mâ stregno a me
e le dongo nu vaso, e po duje, tre, quatto, cinche
o quanno camminammo a core a core
câ mano ncoppa â spalla…
si nun è poesia chesta, diciteme vuje cos’è?
E quanno me dice “Iammo a fa ‘a spesa”
e io pronto zompo dinto â machina
e l’accompagno;
o quanno me dice “Faje chesto… faje chello!”
e io subbeto obbedisco;
o quanno dice “Puorteme ccà, puorteme là!”
e io nun mô faccio dicere doje vote…
si nun è poesia chesta, diciteme vuje cos’è?
E quanno è festa ô paese mio
e nzieme iammo a fà na bella passiata
sotto â lummata câ mano dinto â mano
comme a duje piccioncielle nnammurate
o quanno iammo ê sagre dê paese
a ce mangià ‘na porchetta o na sasiccia cô panino
pâ fa stà nu poco câ capa cuièta…
si nun è poesia chesta, diciteme vuje cos’è?
E quanno vaco â muntagna
e le porto nu mazzo ‘e viole chê fragole
o quanno le faccio truvà na rosa pâ festa
o nu ramo ‘e mimose fresche e adduruse…
si nun è poesia chesta, diciteme vuje cos’è?
Allora, vedite, nun c’è bisogno ‘e scrivere
quatto parole pâ mugliera
ncoppa a nu foglio ‘e carta…
‘a poesia se scrive diece vote ô iuorno,
ogne mumento, ogne sicondo,
chê corde dô core, in silenzio
senza fa sapè niente a nisciuno!
Senza scrivere verse câ rimma o senza ‘a rimma
‘a mugliera… già è na poesia!!!
(Baiano, 20 luglio 2014)