Vuje nu sapite chi songo io!
‹‹Alto… bello… biondo… e cu l’uocchie azzurre!
Guardate cà, gente gè!
Manco ‘o figlio dô re è accussì!
Chi è meglio ‘e me ncoppa a sta terra?
Vuje nu sapite chi songo io!”
jeve dicenno pê vie dô munno
settebellézze câ capa aizata.
“Io ‘e femmene ‘e straccio
e me conzolo quanno cadono annanze ê piede mieje.
Vuje nu sapite chi songo io!
L’amìce? Si ce stanno l’aggio ‘a sfruttà,
si me vonno hanno ‘a bussà!
Ma io – scusate ‘a cafunata! – nê caco propio!
Vuje nu sapite chi songo io!
‘E pariente? Ahè!.... So meglio ‘e sorde, vô dico io!
Quanno parl’io avete ‘a nzerrà ‘a vocca,
vâ avite ‘a cósere!
Vuje nu sapite chi songo io!
Io…. Io songo…››
‹‹Tu?... E mo tô dico, bello chiatto chiatto!
Tu nun sì manco ‘a scumma
dê fasule curnicielle cuotte ncoppa â furnacèlla!
Tu nu vale manco nu buttone
‘e nu cazone scusuto e ribbattuto!
E mo vatte a fa na passiata
primma che tê conto l’ate quatto!››
Ahh! M’aggio levato sto piso a coppa ô stommaco!
‹‹ ‘O sapimmo! Nuje nu simmo nisciune!
Nu valimmo propio niente!
Ce facimmo ‘e fatte nuoste!
Nu simmo aute, nu tenimmo ‘e capille bionde
e nu tenimmo l’uocchie azzurre!... Però…
Però sapimmo tenè ‘e femmene
ncoppa ô palmo dâ mano,
aprìmmo sempe ‘a porta dô core a l’amìce e ê nemice,
sapimmo vulè bene ê pariente
e quanno parlammo câ gente
vulimmo che ‘a gente parla cu nuje!
Embè! Simmo pròpio accussì:
‘e vocche cosute nun ce piàceno. ››
‘A vita m’ha mparato na cosa facile ‘a capì:
chi dice ‘e sapè tutto
state sicuro che nu sape propio niente
e chi dice che è ‘o meglio
è sempe l’urdemo d’ ‘e ciucce.
‹‹Tu sì cumminto d’essere ‘o primmo,
‘e sta ncoppa ó pulpito
pe ce fa ‘a prédeca a nuje che simme
quatto allocche senza arte né parte?
Peccato che ‘o specchio te fa vedè sulo ‘a scorza,
ma si putesse trasì sotto ‘a pelle
pe leggere chello che nun se vede da fore
tu caparrisse quanto overamènte cunte.
E peccato che tiene ‘e recchie appilate,
accussì nu siente ‘e risate dâ gente!
E mo lasciammo stà sti penziere
o si nno a furia ‘e dìcere chi songo io e chi sì tu
me scordo d’essere cristiano
e te sono na mazza nfronte!
Te ciacco, dicono ô paese mio.
E mo lèvate ‘a nanze ‘e piere
che me faje ombra,
famme parlà câ gente semplice comme a me,
chella che dice pane ô pane
e vino ô vino.
Nun te scurdà maje che ‘o Pateterno
è uno… e sta ncielo.
Nuje nu simmo nisciune ncoppa a sta terra
senza ‘e pariente, senza ‘e femmene,
senza l’amìce e senza ‘e cane e ‘e gatte.
Chille comme a te hanno da sta sule
chiuse dint’ â stalla câ porta chiusa
pecchè ‘a puzza fete assaje!››
(Baiano: 13 Luglio 2014)