‘A  notte  ‘e  Natale

È  vierno.

Chiove e tira ‘o viento ‘a na semmana.

Passa n’ aria fredda pe sott’ ‘a porta

che arriva fino a dint’ â l’osse.

‘E guagliuncielle  se strégneno sott’ ‘o fuoco

pe sentì ‘e cunte d’ ‘a nonna.

«Ce steva na vota nu re e na bella regina...»

Cu ‘e  lacreme a l’uocchie  Maria penza

a chillu povero Cristo muorto  in guerra,

mentre nasce ‘o Bambiniello

‘a notte ‘e Natale dint’ â stalla.

«Chi vene e chi va!» dice chiagnenno.

Nu sape pe chi è muorto ‘o marito

e prega ‘o Signore ncielo:

«Signò, - dice - Totonno era nu bravo ferraro,

sapeva ‘o mestiere e nun era carestuso.

Pazziava sempe, rideva, cantava,

sunava ‘a fisarmonica ch’ era n’ ammore.

Chiagnenno è ghiuto a fà ‘a guerra!...

Ce diceva che nu vuleva sparà

a n’ atu pate ‘e figlie,

che nu vuleva accìdere nu povero ferraro,

nu studente, nu masturascio

senza sapé ‘o pecché!

Nu vuleva... ma l’hanno acciso

senza sapé ‘o pecché!

Signò, dà forza a sti piccirilli

e perdona sta povera figlia

che pure ‘a notte ‘e Natale

s’ha da vénnere  l’anema pe campà.»

Chiove ancora e tir’ ‘o viento.

Fa friddo dint’ â sta casa.

Sulo ‘a nonna porta nu lampo ‘e calore!

«Nce steve na vota nu lupo mannaro

che se mangiava ‘e bimbi cattivi…»

«A no’, ma papà era n’eroe?»

«Oi nì, bello d’ ‘a nonna, papà?…

Papà era nu pate ‘e famiglia,

penzava a vuje e nu vuleva murì

pe na cemmeraglia d’oro!
Penzava sulo ‘e turnà â casa!»

Chiano chiano se stuta ‘o fuoco

e ‘o suonno scenne doce doce,

e mentre ‘a Maronna se stregne mpietto

‘o Bambiniello che nasce,

Maria torna a casa cô pane

pure ‘a notte ‘e Natale!

(Baiano,  25 Dicembre 1979)