‘O sordomuto
Nu guagliunciello
ncopp’ â fenesta
guarda...
guarda e nu parla,
dà na mullica ‘e pane
a n‘auciello,
fa na carezza a nu micillo
e si sta zitto.
“Uè! Sabbatù, vien’ a pazzià!”
Ma Sabbatuccio guarda...
guarda e nu parla.
Nu pò sentì,
ma capisce che ‘o vonno sfottere!
Sabbatuccio nun è ghiuto a scola!
Fa na carezza ô micillo
e l’ uocchie suoje vanno luntano,
s’ avizzano ncielo
e pensa:
“Comme sarrìa bello
puté sentì
e puté dicere:
cà ce stò pur’ ìo!”
(Baiano: 14 Gennaio 1979)
_______
(Napoli: 23-11-1991 -“Premio speciale”
alla 1ª Rassegna Nazionale di Poesia “Giovanni Ponticelli”)