‘O Presepio
“ Mammà, nun ‘o facimmo ‘o presepio?
Mo vene Natale,
nasce ‘o Bambiniello! ”
“ Guaglió, agge pacienza!
Io tengo da fà! ”
Io ero piccirillo
e chiagnevo annascuso sott’ ‘a tavula.
Mamma mia era stanca!
Aveva faticato tutt’ ‘o juòrno.
‘A sera vulev’ ì a ripusà!
“ Guaglió, lascia stà ” me diceva.
“ ‘O facimmo l’anno che vene! ”
Ogni anno me diceva:
“ ‘O facimmo l’anno che vene! ”
N’anno, duje anne, diece anne...
Quant’anne sò passate
senza fà maje nu bello presepio!
Mo mamma mia tene ‘e capille ianche,
s’è fatta vecchia
e pass’ ‘a jurnata dint’ â casa.
Va annanze e arrèto, nu trova pace:
mo cose nu buttone, arrepezza nu cazettino,
po’ scop’ ‘a cammera,
prepar’ ‘a cucina.
Sulo mo s’accorge quant’ è bello
nu presepio dint’ â casa,
sulo mo che duje angiulille
‘a chiammeno: “ ‘A no’... ‘A no’ ! ”
Mo dice che ‘a casa è vacante
senz’ ‘e pasture, senz’ ‘e zampugnare,
senz’ ‘o Bambiniello Gesù.
“ Guaglió, bell’ ‘e mammà,
chist’ anno ‘o presepio nun ‘o faje ? ”
“ Oi mà, -le dico- lasciammo stà.
‘O facimmo l’anno che vene ! ”
Mammà cala ‘a capa...
e nun me risponne.
S’allicorda quann’ io chiagnevo
perché nun se faceva ‘o presepio.
Se va a cuccà cu l’uocchie triste
e c’ ‘o desiderio d’ ‘o presepio.
Ma nu dice niente, nu parla!
Cala sulamente ‘a capa:
vurrìa chiàgnere pur’ essa
sott’ ‘a tavula!
S’asciutta doje lacrime
senza ‘e se fa vedé...
e se va a cuccà.
Stanotte io nu putevo chiudere l’uocchie.
Penzavo a mamma mia e ô desiderio
che essa teneva d’ ‘o presepio.
Aggio sciso abbascio a mezzanotte
e cu nu poco ‘e paglia, nu cippone
e duje pasture l’aggio fatto
‘o regalo ‘e Natale.
(Baiano: 16 dicembre 1976)