’O specchio
«Specchio, specchio delle mie brame,
chi é la più bella del reame?»
A dire ‘o vero:
tu no... tu proprio no!
Ca tu t’allisce, ca tu t’acconce,
ca tu te pitte, ca tu t’arrízze:
sì sempe tu, sì sempe brutta!
Lascia perdere, lascia stá,
nun te truccá, nun t’arraggiá;
l’anne stanno sempe llà!
«Specchio, specchio delle mie brame,
guarda ccá! Chi é la più bella del reame?»
Ca tu ‘e tire, ca tu ‘e vizze,
chelle s’ammosceno sempe
comm’ a doje pere ‘ncopp’ â panza!
Lascê stá, nun ‘e tuccá,
a chesta età lascê pennere,
lascê fá ‘o tiempo lloro!
«Specchio, specchio delle mie brame,
ci sono più belle nel reame?»
Ca tu zumpe, ca tu curre,
‘e presútte stanno llá,
nisciuno ‘e mmove, nisciuno ‘e lleve,
aváscia sta veste, nun ‘e fà guardà.
E mo siente a me, lasciame stà,
nun me nzurdá ogne matina,
cummuóglie ‘o specchio,
nun t’ammirà, chillo dice ‘a veritá!
Cocche vota t’impressione
e ce rieste male.
Lascia perdere, lascia stà,
cagne mestiere, nu fà ridere ‘a gente.
Si sì bbella o si sì bbrutta
nun è ‘o specchio ca ce 'o dice:
é l’ammore ... È l’ammore,
se ‘o ttiene dint’ ô core!
Ma se llá ce tiene ‘o male
allora scuordate e t’ammirá!
(Baiano, 16 Dicembre 1993)