Si putesse turnà tant’anne arreto
Si putesse turnà tant’anne arreto
quanta cose mettarria int’ ‘o setaccio
pe vuttà ‘o scarto a ll’aria
e stipà sulo chello ca ce cunzola.
Mozzarrìa ‘a lengua
a chi annanze me fà ‘a faccia bella
e po me scarpesa cu malacrianza;
cacciarria pe sempe dô core
chi nzurfa e spanne veleno
mbruglianno ‘o vvero cô fauzo;
cecarria l’uocchie a chi ‘a mmiria prova
e ‘a forza nu tene ‘e se guardà ô specchio
pe capì chi è primmo e chi vene doppo
e semmena grammegna mmiezo ê sciure.
Si putesse turnà tant’anne arreto
quanta cose belle io farria
ca so ricuorde senza fine.
Vularria â scola pe guagliune
pe fa nascere l’ammore,
vedè zumpà ‘e cavallette
e ‘e mane ca s’astregneno
attuorno ô masturascio,
‘e corze a chi arriva primma
ogne matina pâ vrenna ncopp’ê banche.
Si putesse turnà tant’anne arreto
quanno spunta ‘o sole cô frisco
purtarria ‘o ciuccio cô traino
â massaria ‘e patemo câ mappata
pe girà ‘a terra câ zappa,
scugnà ‘e fasule cô vavillo
e vunà a mano ‘e nucelle pe campà.
Se putesse fa na sceveta
beh! ciento vote ancora turnarria là
ncopp’â porta ‘e chillu treno
addò ‘o core zumpatte ‘a fora
pe na femmena cu ll’uocchie nire
ca nun mâ lassaje scappà
e ‘a purtaje subbeto a ll’altare
cô velo janco e ncravattato!
Ma arreto nun se torna
e amm’ ‘a guardà annanze
sbracciannoce mmiezo a ll’onne
p’arrivà addò ‘o cielo tocca ‘o mare
primma che more ‘o sole.
(Baiano, 13 agosto 2023)